Kronik antik (I): Tafigurit n ddunit ɣer imezwura-nneɣ

capture-decran-2016-09-25-a-00-40-42

Imezwura-nneγ ttgen aṭas azal i tmeddurt d wayen sen-d-yezzin. Ttidiren swayen sen-d-tefka tmurt, degmi ḥemlen akal, ttjuṛ, abeḥri yelhan, lmal, ifṛax, aman. Nnan-d zik-nni, imezwura-nneγ, am nutni am yegduden n wagerkal, ttamnen s yiṭij. Ma tegrem tamawt ad tafem mazal ar ass-a llan wagad yettgalen s teḥbult n yiṭij. Acimi ttamnen s teḥbult n yiṭij ? Imezwura-nneγ ssnen d acu i d azal n yiṭij. Zṛan d netta i d tudert. Zṛan lammer ad yexsi yiṭij, d ayen, ad tenger ddunit. Zran lammer ulac iṭij, tilli ur tettili ara tudert, ur tettili ara ddunit.  Iṭij, neγ tiṭ n igenni (akka s-iqqar Ayskulus, amyaru agrikki n tallit tis V zwar tallit-nneɣ) d netta, γer imezwura-nneγ, i d bab n tudert. Assagi, ula d imusnawen nnan-t-id, ammer ad yexsi yiṭij, ad tenger ddunit. Ammer mačči d iṭij, ur tettili ara tudert dagi di lqaεa. D netta i yettaken tudert i kulci, d netta i yettaken afud i kulci.

Imezwura-nneγ ttamnen s yiṭij d tziri imi zran d akken sin-agi d nutni i d tiliwa n tafat.  Tafat n yiṭij d ass. Syess i nettwali ccbaḥa n ddunit, tizegzewt n igenni d yilel, tizegzewt n lexlawi, iseγma n ijeğğigen d wayen akk yelhan i tmuγli. Tiziri, nettat d taknit n yiṭij, s yess i nettwali deg yiḍ. D nettat i yeskanen abrid i yiminigen n yiḍ.

Imezwura-nneγ ttidiren d tegnac. Yal tagnect d acu d-tettawi. Ssnen d acu i d azal n wesru. Zṛan melmi ilaq ad megren, melmi ilaq ad meglen, melmi ilaq ad ẓẓun, melmi ilaq ad kerzen, melmi ilaq ad srewten. Ssnen ad steqsin aggur d yetran. D nutni i sen-d-yettemalen d acu ilaq a t-gen, melmi ilaq t-gen.

Imezwura-nneγ, wid-nni iwumi qarren Yegrikkiyen «Ilibbiyen», neγ ma tram igduden n waman,  ttamnen s waman. Aman, am tafat n yiṭij, ammer ad negren, ad tenger yid-sen ddunit. Iṭij d waman d nutni i d tameddurt.  Degmi i rran ageniw, neγ aεessas i yal tala, i yal amdun, i yal asif… Imezwura-nneγ ṭafaren aman. Anda tufiḍ tala, ad tafeḍ dinna imezdaγ.

Imezwura-nneγ, imi ara yilli uγurar, ttgen Anẓar. Anẓar neγ Geldaman, agellid n waman. Yal m ara d-yeγli uγurar, yal m ara sen-yekkes Wanẓar, ugennaw n ugeffur, aman, ad fernen tameṭṭut yelhan, ad s-tt-awin d tislit. M ara d-yaweḍ lawan akken ad feṛqen tiregwa, ttgen timecreṭ, zzelun-as azger.

Deg yidles-nnsen, neγ di ddin-nnsen, ad tafeḍ amdan d netta i yeṭfen talemmast n tmeddurt, d netta i γer d-icudd kulci. A s-tiniḍ ḍeffren abrid n Pṛutaguṛas, i d-yuran di tallit tis V zwar tallit-nneɣ, d akken «Ɣer wemdan i tettwaktal yal taɣawsa». Fell-as i teddewir teḥbult n yiṭij. Ar imezwura-nneγ, yal amdan γur-es tamacahutt-ines, γur-es taligenṭ-ines (légende), γur-es tirga-ines. Syess i llant tγawsiwin. Degmi i d-yesnulfa tisquma. Imdanen snulfan-d leqwanen swayes ttidiren. Imezwura-nneγ, am nutni am Yegrikkiyen d Iṛumaniyen, γas akkenni ttamnen s igennawen, maca tteklen kan γef yiman-nnsen. Ma tegrem tamawt, γer wannect-agi i sawḍent assagi tmura yeṛwan.

D amdan i d kulci. Ar γer-s i llant tsura n ddunit.  Atah ihi ayen i ttnejmaεen imezwura-nneγ. Umnen d akken di tmeslayt i tella tifrat i yal tiyersi, i yal ugur. M ara qimmen i temsalt, ḥemmlen a tt-qerdcen, a tt-ḍefren ḥacama d tilist. Ttaken aṭas azal i wawal. I m ara nejmaεen, yal amdan yezmer a d-yefk ṛṛay-is. Deg umeslay i tella tafat, i tella tifrat. Akken i t-yenna Arisṭutilis «Amdan d aẓwen  i ilan awal, d aẓwen apulitikki»

Di tejmeεt, yella lqanun. Lqanun-agi, yiwen mačči yezmer a t-iṛez. Ur xelṭen ara lecγal n igenni d wid n lqaεa. Imezwura-nneγ ttidiren s leqwanen d-snulfan, mačči s leqwanen n yigenni. Igenni, ttaran γer-s ayen ur nellin ara kan deg yefassen-nnsen. Igennawen, nutni, si tama-nnsen, lhan d tudert-nnsen. Akken i s-yenna Pṛutaguṛas «Ɣef Yegennawen, ulac d acu i zemreɣ a t-id-iniɣ, ur d-qarreɣ llan, ur d-qarreɣ ulac-iten». Imi γer imezwura-nneγ, igennawen ur d-lhan ara d yemdanen, γur-sen lecγal-nnsen ula d nutni. Degmi yiwen ur tt-yettalas i wayeḍ. Imdanen γur-sen tilelli. Amdan yezmer ad yesuter ayen yebγa i igennawen, maca ma yella ur s-ddin ara di lebγi, amdan-nni, γur-es azref akken ad ten-yenkeṛ. Ulac d acu ara yaggad, imi igennawen n zik-nni ur ttečḥen ara. Lhan kan d tudert-nnsen ula d nutni, dihenna deg igenni.

Igennawen n zik-nni ur d-fkin ara leqwanen swayess ara idiren yemdanen. Yal amdan yettidir s leqwanen-ines, netta d widak n tmurt-is. Asmi ara mmten, ulac anwa i ten-yettcaṛaεen. Ulac win ara sen-yinin ayγer tgam akka neγ akka. Degmi ulac win yegganen neγ win yettmettaten s uγilif d nndama. Imdanen n zik-nni, zṛan ad mmten, ad  ṛuḥen ar tgelda n Yakuc neγ Aydes, agennaw n lmut, anda ara uγalen d lexyalat, maca iman-nnsen, neγ ṛuḥ-nnsen, ad yuγal d afeṛṭeṭṭu, ad yettezi yal iḍ s ixxamen-nnsen, ad yeddewir γef teftilt n lamba. Di tgelda n Yakuc, wid yemmuten, kifkif-iten akk.  Ulac dinna lğennet, ulac times. Degmi imezwura-nneγ ur ttaysen ara ad mmten. Ḥemmlen teγzi n leεmmeṛ. Ḥemmlen ddunit.  Hemmlen ad faṛsen zzhu, učči, tissit d tayri, imi zik-nni ulac d acu i yeḥeṛmen, ulac d acu i yeḥellen.

Imezwura-nneγ umnen s waṭas n yegennawen. Yal agennaw γaf wacu i d-yezga. Wa γef lmut, wa γef waman, wa f yegenni, ta γef tayri, ta γef tẓegwa, ta γef tlallit, ta γef tmusni, wa γef yinig, wa γef ccbaḥa, wa γef aman, wa γef tissit d zzhu, ta γef lexlawi… Igennawen-agi ttidiren deg genni, deg Iter. Tikwal tikwal, ttṣubbun-d ar lqaεa, maca m ara d- ṣubben ttbeddilen tafekka. Tettin d yemdanen. Degmi, zik-nni, imezwura-nneγ ttεuzzun abeṛṛani, qarren-as ahat ammer d agennaw i γ-d-ibedden γef tebburt. Degmi i s-ttuγalen d laεnaya. Tella akka ula γer Yegrikkiyen. M ara d-yass γer-sen ubeṛṛani, a s-fken zwar ad yečč, ad isew, ad igen, swamek imiren ara t-steqsin γef yisem-is d wansi d-yekka. Mektit-d Udissus asmi iwweḍ ɣer tmurt n Yefayaksen.

Igennawen n zik-nni, tikwal dellun-d akka γef yemdanen. Win yesunebgen yis-sen, ibedd γer-sen akken ilaq, winna ulac akk d acu ara yaggad si tama-nnsen, ma d win ten-yerran γef tebburt, winna ur s-ttefγent ara i yiri. Mektit-d agellid n Taybis, asmi yerra ɣef tewwurt n tčitta -ines agennaw Dyuniẓus. Ssyin sakkin gerzent-t d ticriḥin yemma-s d yestma-s. Imi igennawen n zik-nni, weεṛen i m ara rfun.  Degmi imdanen i sen-zzelun, i sen-ttgen timeγriwin, ha d imensi n iwejiben, ha d imensi n yennayer, ha d timecreṭ, ha d tislit n Wanẓar, ha d amagger n tefsut…

Imezwura-nneγ ḥemmlen tamusni. Yal tameddit, mi ččan imensi, ad zzin i teṛbut n tmusni akken a d-awin timucuha d tmesaεṛaq. Taṛbut n tmusni d nettat i d lakkul zik-nni. Dinna i lemden iggurdan ddunit. Dinna i ten-sγarayen yemγaren. Taṛbut tesmektay-aɣ-id asimpusyun (banquet) n Yegrekkiyen: imi ara mlillen ad swen, tmeslayen, ttfiluẓufiyen, akken tzemrem a t-teɣrem ɣer Gzinufun neɣ ɣer Plaṭun.

Ameziane Kezzar / Mohand Lounaci

(Amagrad-a yeffeɣ tikkelt tamezwarut di usmel: marenostrumarcadia)