Ikiniken iqvayliyen

capture-decran-2016-09-25-a-01-26-05

S tiḍet Leqbayel ttakken azal i wawal, maca awal-nnsen ur turin ara. Degmi aṭas n wayen d-nnan wagad γ-yezwaren ur γ-d-yewwiḍ ara. Amek ttmeslayen imezwura-nneγ di tallit taṛkayit ? Yiwen mačči yezmer ad d-yerr γef westeqsi-yagi, γas akkenni di tallit-nni, ulac din ccekk, llan imedyazen, llan iḥeddaden n wawal akken qarren.

Di teqbaylit tella tmusni, llan imusnawen. Maca imusnawen-agi mačči d widak n lakkul, d widak n tudert. Ulac win i ylemden taqbaylit di lakkul, yal yiwen kan ilemd-itt di taddart-is. Llan wagad yessnen ad meslayen γef terwest, llan wagad yessnen ad meslayen γef wemdan, llan wagad yessnen ad meslayen γef tudert… D acu tamusni-nnsen, akken kan ara mten, ad temmet yid-sen. D wagi i d ugur n yedles n yimi.

Atah tura acimi i γ-tṛuḥ tmusni-nni yellan zik. Amer ukkan uran imezwura-nneγ tili ass-agi aql-aγ am Yegrikkiyen d Ilaṭiniyen… γas ma timeslayin-agi ulac tura win i tent-yettmeslayen, maca ayen uran mazal-it, yuγal maḍi d llsas n yedles n tmura umalu yernenin. Amek ddren imezwura-nneγ di tallit taṛkayit ? Di tallit taklaṣikkit tagrikkit ? S wacu i ttamnen ? D acu i d-nnan imedyazen-nneγ imezwura ? Imi iban kan akka d akken di yal tallit llan imedyazen, llan wagad d-yesnulfuyen timucuha. Γef wayagi, ass-agi, taqbaylit ur tebni yara, am tegrikkit d tlaṭinit, γef tmusni tagrakalit taṛkayit.

Ass-agi m ara nsel i wigad yettmeslayen γef zik, ad tafeḍ tamuγli-nnsen, ma tesebεed aṭas, tettaweḍ γer tallit taṭurkit. Attah tallit i wumi qarren zik. Ayen d-yezwaren tallit-agi ttun-tt. Neγ xas ma yella llan wagad tt-id-yettadren, ttadren-tt-id kan deg umezruy n igelliden n Numidya d tmura n tefrukt ugafa. Maca ayen akk icudden γer tudert n yal ass n igelliden-agi, γef yegduden-nnsen, γef yedles-nnsen… Ulac. Rnu ula d ciṭuḥ-nni d-nufa yettwaru γef tallit-nni, ad tafeḍ uran Yegrikkiyen d Iṛumaniyen.

D acu i yesawḍen timeslayin n tegrikkit d tlaṭinit ṭṭfent amkan amenzu di tallit tantikkit ? – Ma nebda s tmeslayt tagrikkit, taginni tella am teqbaylit-agi-nneγ ass-a. Tella ttmeslayen-tt Yegrikkiyen, maca yal tama amek tt-ttmeslayen. Ula d Humirus ur yuri yara. Yella d amedyaz n lqern wis-VIII zwar tallit-nneγ, iteddu γef tegzirin d tmura tigrikkiyin icennu imutuyen n Ilidya d Udisiyus. Snat n tmucuha yagi ur tent-urin ara Yegrikkiyen almi d lqern wis-VI zwar tallit-agi-nneγ, asmi yeṭṭef deg ṛṛay utiṛan Pizistṛatus.

Tameslayt tagrikkit bdan ttarun-tt Yegrikkiyen asmi d-snulfan tačiṭa, asmi εeddan di leqwanen n igennawen γer leqwanen n wumdan. Igrikkiyen uran leqwanen-agi, syen sakkin bdan ttarun timucuha-nnsen d wayen akk icudden γer yedles-nnsen d tmeddurt-nnsen. Ladγa asmi d-ffγen ifizikkiyen iyuniyen, neγ ma tram ifiluẓufen imezwura neγ ifiluẓufen zwar-Sukṛatis. Tameslayt tagrikkit, am teqbaylit, yuγ amkan meqren di tgerwa. S tegrikkit i ttmeslayen Yegrikkiyen m ara gerwen. Maca diγen tameslayt tagrikkit tekcem diγen axxam n teγdemt. Syes iferrun Yegrikkiyen ibṛusiyen-nnsen. Yal Agrikki izmer ad iwwet γef yiman-is m ara iεeddi deg webṛusi.

Deg ibṛusiyen yellan di tmurt n Tegrikt di lawan-nni tettak nuba i umeslay, i imenγi n tiktiwin. Win ara yettwiṭṭfen, ilaq-as ad iwwet deg ubṛusi-ines akken ad d-yesenser iman-is di tuccar n teγdemt. Akken ad d-yessenser iman-is, ad tafeḍ yesnulfuy-d tameslayt yal ass.

Tameslayt tagrikkit tewweḍ ar tqacuct asmi sawḍen snulfan-d taṛipublikt. Ladγa di lqern wis-V zwar tallit-nneγ, imusnawen d yemyura itinayen snulfant awalen i yal taγawsa, i yal tikti, ama deg weḥric n tmusni, deg win n tnaẓurt d win n lpulitik.

S tidett Leqbayel, am Yegrikkiyen, sawḍen snulfan-d taddart, snulfan-d leqwanen n wemdan, maca ur urin ara. Rnu diγen ur sawḍen ara akken ad d-snulfun taṛipublikt. Dagi ur d-nettmeslay ara γef tallit taṛkayit, maca ar ass-a, taqbaylit teqqim kan di taddart. Ur tesaweḍ ara ad tili d tameslayt tameqrant imi ur tesεi yara taṛipublikt. Mačči kan, ula di teγdemt, mačči d taqbaylit i iteddun di tmurt n Leqbayel. Degmi teqqim kan deg isefra, di tmesεṛaq, di tmucuha neγ m ara nettqessiṛ ger-anaγ.

Taqbaylit ur tufi ara abrid am tmeslayin nniḍen akken ad ttaf iman-is akken ilaq. Timeslayin nniḍen ufant iman-nnsent s leqwanen. D leqwanen i yessulin timeslayin mačči d nnif, mačči d tayri n yedles d tmeslayt. Ass-agini, amer lqanun ad yebru i tmeslayt tafṛansist di Fṛansa, ad tafeḍ imezdaγ n tmurt-agi, ger-anaγ d kra n iseggwasen, ad tafeḍ ttmeslayen takṛiyulit : amexluḍ n tefṛansist d tegnizit d tmeslayin nniḍen.

Kulci d leqwanen. Ḥaca leqwanen i izemren ad sdarin ameslay, tilelli d izerfan n yegduden. Mačči s nnif i swayes ibeddent tmeslayin timuqranin. Beddent s leqwanen.

Ma yella d tameslayt talaṭinit, ula d nettat d tamefrurt n Ṛuma i s-yefkan ifadden. Iṛumaniyen llan di tallit tantikkit ttεanaden γer Yegrikkiyen. Iṛumaniyen bγan ula d nutni ran ad sεun tameslayt meqren, tameslayt am tinna n Yegrikkiyen. Ula d Iṛumaniyen yeṛwan mačči d talaṭinit i sγaren i warraw-nnsen, d tagrikkit. Akken i yexdem ula d Yuba wis-II di tmurt-nneγ. Maca Iṛumaniyen sbedden s lqanun talaṭinit. S yes-s i tetteddu tmefrurt taṛumanit. Rnu diγen imusnawen iṛumaniyen uran yes-s. Tṛeğmen-d akk ayen uran Yegrikkiyen, rnan snulfan-d ula d nutni imutuyen am Yegrikkiyen. Virgilius yurra Eneides, yesnulfa-d tamacahutt am tinna i yella icennu Humirus di Odyssea. Amer d lebγi ass-agi, a nwali d acu i yuran imezwura-nneγ am ugellid Yuba wis-II. Xas akkenni s tegrikkit i yura, ilaq-aγ ad d-nerr s teqbaylit d acu i yura, d acu i d-yenna γef wegdud-ines n tallit-nni.

Tameslayt ur tezmir ara ad d-tifrir ma yella ur tessin ara timeslayin nniḍen. Amer ass-agi ad d-nerr s teqbaylit ayen i yuran Yegrikkiyen d Iṛumaniyen d yegduden yenernan tili ad s_nefk ifadden i tidmi-nneγ d tira-nneγ. Maca taqbaylit mazal-it deg yidles n yimi. Mazal-itt di tγawsiwin n yal ass. Ula d At Yiwen asmi d-wwḍen, akken ad siṭṭfen ddinat-nnsen, wwten s tegrikkit d tlaṭinit. Imasiḥiyen, am yenselmen, lemden tariṭurikt γer Yegrikkiyen, syen sakkin sxedmen-tt akken ad zenzen idles-nnsen d ddin-nsen. Ddin amasihi, akken kan d-yeffeγ, tṛeğmen-t γer tegrikkt d tlaṭinit. Atah tura d acu yesawḍen At Yiwen sεan adiskur, nekkweni mazal. Taqbaylit ilaq-as ad d-tagwem deg idelsen nniḍen akken yal tikti, yal tamuγli ad tesεu imeslayen. Ass-agi yewεeṛ aṭas akken ad meslayen Leqbayel deg wayger-asen, imi taqbaylit ur tesεi yara adiskur, ur tesεi yara taritturikt.

Degmi ar tura, di tmurt n Leqbayel, am lawan-nni taṛkayit tagrikkit, tidett mazal-itt γer ccix n lğamaε, γer idderwicen d imedyazen. Ar ass-a yegguma ad yeṭṭef wawal n tmusni tatrart. Ccix n lğamaε yessen ad yemeslay γef uẓekka, aderwic yettkacaf, ma d amedyaz yessen ad yesni… Anida akk tameslayt ur tesεi yara anya, a tt-tafeḍ ẓayet i umeẓẓuγ.

Taqbaylit ilaq-as ad teffeγ di tsirit-agi. Ilaq-as ad tenerni, ad tuγal d tameslayt n tmusni. Akken ad tuγal d tameslayt n tmusni, tewwi-yas-d akken ad teḍfer timeslayin timeqranin, ad teḍfer ayen d-yesnulfuy wemdan.

Di tallit tamidiyibalit, asmi di lber n Yuṛupa, teḥkem legliz, igduden n tamaṭ-agi n umaḍal lhan d ddin, tesaweḍ tmusni-nnsen, am tagi-nneγ ass-agi, tettmeslay ala γef nnger n ddunit. Maca Iṭelyaniyen ugin. Kkren-d imusnawen-nnsen uγalen γer tala tamenzut n tmusni, γer tliwa tagrikkit d tlaṭinit. D tallit-nni i wumi qarren Tallalit tis-snat, d tallit-nni i d-illul i wumi qarren Taγerma talsant. Tallit tis-snat, imi γer imusnawen amdan yemmut, maca yekker yeswa-d aman n tmusni di tliwa tagrikkit d tlaṭinit, yuγal-ed γer ddunit. D tallit-agi i d-yefkan Galiléo, Dante, Michelangelo, Leonardo de Vinci d wagad nniḍen.

D Tallit-agi taṭelyanit i d-yefkan tallit n tafat di Fṛansa, i d-yurwen ifiluẓufen ilmaniyen, imusnawen igniziyen d imarikkaniyen… D tallit n Tlallit tis-snat i d-yerran tadimukṛatit n yegrikken, i d-yerran azref aṛumani, i d-yerran tidmi tantikkit. S wannect-agi i yebnan yegduden iγerbiyen timura-nsen.

Taqbaylit γur-es tamusni, maca ur tesεi yara imusnawen am widak-nni d-turew tmurt n tegrikkt d tmurt n Ṛuma. Taqbaylit teğğa-d imedyazen d lawliya am widak-nni n Tegrikkt n tallit taṛkayit. Maca ur d-teğğ’ ara imusnawen am Sukṛatis, am Dyuginis, am Plaṭunus, am Dimukriṭus, am Kikiṛun, am Sinikki… Tira n teqbaylit si tebda kan tettṛesi iman-is, si tebda tetteṭeṛgim-d timusniwin nniḍen… maca ilaq-as ad teg akken gant tmeslayin timeqranin, ilaq-as ad tekki γef tegrikkit d tlaṭinit iwakken ad tterrent d tameslayt n tmusni. Nezmer ad d-naf awalen i tfiluẓufit, i tmedyazt, i tsekla, maca ur nezmir ara ad d-naf awalen i wayen icudden γer tmiddikkit, tabyulujit, tatiknulujit… Nezmer ad d-naf isem n teqbaylit i znezla, maci ur nezmir ad t-id-naf i tsismulujit; nezmer ad d-naf isem s teqbaylit i waṭan, maca ur nezmir ad t-id-naf i ddwa-s… Aḥeq Ipukṛattus, ar akka akw ixeddmen leğnas… wagad ifaqqen.

Taqbaylit i wumi neqqar ass-agi taqbaylit n zik d tinna akkenni ttmeslayen di tallit taṭurkit, tinna akkenni ifeṣel ddin d tikta tiddiyaniyin. Tameslayt taqbaylit n zik d tinna i yettwarun d tinna i yuran wagad yeγran leqṛan. Γef wayagi iteččuṛ d awalen n taεṛabt. Maca tameslayt-agi γur-es tilisa. Teqqim kan dinna. Tezmer kan ad temmeslay γef wayen icudden γer ddin d tmeddurt n yal ass, maca m ara tekkreḍ ad temeslayeḍ γef tmusni tatrart neγ γef lpulitik, ad tafeḍ ulac. Dinna ituḍen icc-is. Dinna i d-kečment tmeslayin nniḍen, almi d-nufa iman-nneγ nettmeslay takṛiyulit.

Taqbaylit n wass-a

Taqbaylit degmi ur tt-nettaru yara, tuγal d lmecmel. Ur tesεi yara leqwanen. Maca di tudrin-nneγ yal yiwen yettmeslay taqbaylit-ines. Wid iḥerfen d wid yettuṛebban qqaren

Anεam, yerbeḥ; wid ijuhden qarren lḥeṛb, lḥuṛiya, lğic, tuṛa-nni, lğihad fi ssabbil llah; wid yettẓallan qqaren leblis, ttarik ṣṣalat, yawm lḥisab welεiqab; yawm lqiyama; wid ifehmen qarren ddenya bi esriha, rubbama, lmuhim; εla kuli ḥal, wid yettsewiqen qarren lbiε wecra, ras l-lmal, terbeḥ; wid d-yesεeddan lεeskeṛ qarren ğundi, ssahat l-laεlem, ḥedd tnin, estaεed estaṛeḥ, wah; wid d-yefγen di lakkul n lzzayer qarren aqsim bi llah, wallah ṣaba, llah iṛeḥmu ncallah; wallah lol; wid iteddun d iğadeṛmiyen qarren sselk ṛṛas-k, beddel ssaεa terbeḥ, kul keskas yeεṛef γerbal-u; wid ixeddmen di Fṛansa qarren wallah laddim, llah ister, laḥcuma; wid ikessen qarren qqelhu wellah; wid yettmettaten qarren lay llah in llah; wid iwwehmen qarren ṣṣebḥan llah!; wid ten-yettaṭṭafan qarren besm llah; wid ijemlen leqṛan qarren ma cca llah!, tbaprek llah!; wid icelxen qarren ṛezq llah; wid yettγanfin qarren ya εudub i llah; wid ur nettamnen ara qarren wellah wellah!; wid serfayen iggurdan qarren ali wallah!; wid tt-yeččan γef teεrurt qarren aṛḍ llah; wid ijemεen iṣurdiyen qarren yemmat yemma-hum; wid yettekkaren zik qarren nhar-k mebruk, wac ṛak ?, llah isahel; wid yeṛwan laεqel qqaren kul εeṭla fiha xiṛ, waḥda waḥda; wid yettikkin γer ddula qarren ḥubb lwaṭen, lmuğtamaε, ṛṛuḥ l-lwaṭaniya; wid iεecqen qarren ya leγzal ya leγzal, ya εemṛi, a ḥebbu, ya gelbi; wid yeznuzuyen zzeṭla qarren sselεa mliḥa, lγubṛa; wid yeskiddiben qarren ma yenfeε γir ṣṣeḥ; wid yettamnen qarren ma ttamen zbeṛbuṛ; wid yettakren qarren ṣṣeli weṛfeε sebbaṭ-k; wid mi kfan qarren ma bqa f lwed γir ḥgaṛu; wid yuysen qarren ḥyu-ni lyum qtel-ni γedwa; wid yugaden ad mmten qarren ma saεd-ek ya faεl lxiṛ; wid yettakken lḥeq qarren yaεṭi-k ṣṣaḥ’, baṛak llahu fi-k; wid icennun i yelmeẓyen qarren fi xaṭṛ la jeunesse; wid yekkaten timeγriwin qarren nḥebb-ek ya mon amour, a k-meğğeγ jamais jamais, ad k-m awiγ obligé; tid yerfan γef yergazen-nnsen qarrent wac εendi fi-h, ddir ma fi-k; wid yettuẓẓumen qarren ṣṣaḥa remḍan-k; wid ittcebiḥen deg wass n lεid qarren ṣṣaḥa εid-ek, εid-ek mebṛuk… tkemleḍ-as akkagi.

Atnad wid i wumi neqqar ssnen taqbaylit. Attan teqbaylit i wumi nsel yal ass. D taginni i γ-d-tefka teswiεt i deg nella. Amek triḍ ad taruḍ s wannect-agi. Yal yiwen amek yettwafeṣel yiles-is. Aql-aγ nebεed aṭas γef tmeslayt tamusnant. Ugar n Leqbayel ttmeslayen am tmacinin, mazal ara testeqsiḍ, a k-d-yefk tiririt. Tiririt-nni werğin telli ines. Wallit kan wagad d-yettεeddayen di tilibizyu. Imγaren d temγarin, mazal ar wallin amikṛu ad bdun : « Fṛansa texdem deg-nneγ lebγi-s », « taddart-agi-nneγ dagini immuten akk waṭas n lγaci di lgirra-nni », « Taddart-nneγ aseggwas-agi nezla tlata yezgaren, ma nedder qabel a nezlu ṛṛebεa di lehna », « Nesaram ad tekfu akk cedda-yagi, ad ifak akk leḥṛis-agi, ad tbeddel ncallah », « Neḍmaε ncallah a d-yuγal weγrib s axxam-is », ma yella d ilmeẓyen, nutni, akken ara ten-steqsin, ad sen-tesleḍ : « Leflani llah iṛeḥmu », « Ad hduγ taγwect-agi », « Llah ibarek !  » – tagi m ara walin agrud-; « A s-nini tanmirt i bab n tmeγra », « Nettcekiṛ tidukla-yagi n taddart-nneγ aṭas aṭas », « A s-nini mebruk i yesli d teslit », « Ad faṛseγ tagnitt akken ad sεeddiγ slam aḥmayan », « Nesewjad ussan-agi amaynut », « A d-yeffeγ m ara tεeddi lεid ncallah », « Seğleγ di Lzzayer », « Neḍmeε ad taεğeb i lγaci », « Tanmirt i widak akk iqeddcen f yedles n tmaziγt », « Nesεa imusnawen », « Nesεa irgazen », « Ulac irgazen », « Inebgi l-lḥeṛma »,  » Qqimet di talwit, ttḥadaret iman-nnwen ». Ula d iggurdan negla yis-sen, ulac akk win yesεan tameslayt-ines, sεeddan-aγ akk deg yiwen lqaleb, qelben-aγ akk allaγen-nneγ. Akken qaṛṛen : « Ṭṭelba n weẓru, yiwet numṛu. »

Qqim ayen k-yehwan zdat tilibizyu, ḥaca imeslayen-agi i wumi ara tselleḍ. Ur nessin ara a nemeslay. Ad s-tiniḍ d iggurdan. Γur-nneγ kra n wawalen, nesexdam-iten yal ass. Mi k-d-izad kan akka wawal d amaynut, dγa ulac win ara k-d-ifehmen. Atah tura wamek tḍerru d tmeslayt ticki ur t-twalmad ara di lakkul, ticki diγen ur tesεi ara leqwanen i tt-yesdarayen.

Cwiṭ n teqbaylit i mazal nettmagar-itt-id telha, d tinna kan nettaf deg tuγac, deg isefra, deg iḍrisen d umezgun. Imi tinna agad i ten-yuran xemmemen-as aṭas, ṛwan tazla akken ad d-afen awalen, imi diγenna ulac ttawilat, am imawalen, ilaqen akken ad d-tekkseḍ deg-sen awalen swayes ara taruḍ. Maca amek nettaru d wamek i nettmeslay tella ger-asen tesraft, ulac akk d acu i izemren ad tt-yaččaṛ.

Agad yettdebbiṛen fell-aγ, wagad ixeddmen lpulittik, wid d-yeqqaren isalen… kifkif. Ur zmiren ara a d-meslayen ssin wawalen ur d-seddayen ara tameslayt nniḍen. Cwiṭ kan akka deg-sen i yettmeslayen taqbaylit akken iwata. Atah wamek i d-ttawin zik-nni isalen di ṛadyu tis-snat : « Assagini axabbit n Saεid Ḥeddad yehjem γef lğanub n Lubnan yettustεemṛen, ma d lqewat bb waεṛaben yettḥafaḍen γef lehna, nutenti, si lğiha-nnsent, rrant tiγrit. » Attan teqbaylit i tra aγ-tt-tesγer ddula-nneγ. Ass-agini, nezmer diγen ad nsel awalen am : « Tadamsa tewweḍ ar ifeṭiwej azeggwaγ », « Lemxaḍlat ifuḥen ger Bill Clinton d Monica Lewinsky », « Kuṛya n ugafa qedfen amisil »… Akkagi i tṛuḥ, imi negguma ad d-nelmed tariṭurikt tagrikkit, negguma ad d-nesnulfu adiskur swayes i nezmer ad nemeslay mebla ma yella nesexḍal-d timeslayin nniḍen, negguma diγen a d-nadder kra n wawalen, imi mazal-aγ di lqern wis-XXI, nettγil-as d lεib. Akken qarren zik-nni : « Ayen fi ttemsenγan igawawen, ttaḍsan fell-as At Σissi. » – Diγ keč, ayen γef mazal ttemsenγan yegduden yelluẓen, ttaḍsan fella-s widak yeṛwan.

Taqbaylit tettwaγ, tečča tiγrit di yal tama. Ula d awal « ixesṛen » qebblent Leqbayel s tmeslayt nniḍen, ttagwin-t s teqbaylit. Ameslay d ayagi kan i ten-yerḥan, am wid iḥekmen, am wid yettwaḥekmen. « Ma lehduṛ d lfeṭṭa, tasusmi d ddheb », anamek-ines « ssusem. » Γer yegduden yenernin mačči d awal ixeṣren i d lεib, nutni γur-sen d lεib m ara yaker yiwen wayeḍ, m ara yekkes sser yiwen γef wayeḍ, m ara yenγ yiwen wayeḍ, m ara yaker yiwen tidi n wayeḍ, m ara d-yeskan win yeṛwan idrimen-is zdat win yelluẓen, m ara iwwet yiwen tameṭṭut-is neγ yelli-s neγ weltma-s, m ara yeḥqer ugellid agdud-ines….. d wiggini i d lεib γer-sen. Wamag ameslay bran-as, γur-es azref, hdeṛ γef yiman-ik, maca ayen d-tenniḍ ilaq-ak ad t-stenyiḍ tenniḍ-t-id, ilaq-ak ad tqableḍ ayen swayes ara k-d-yeglu, dayen yelhan neγ dayen n ddir. Akken yeqqar Muḥend Uyeḥya : « Axir win yettmeslayen aṭas, winna, deg wayen akk ara d-yini iteddu-d ciṭuḥ n wayen yelhan; wamag asusam, mi d-yenṭeq kan a d-yini leεğeb ». – Maca γer Muḥend Uyeḥya, leεğeb mačči d awal « ixeṣren », γer-s, netta, leεğeb d awal amesbaṭli, d awal ijerrḥen, d awal yetthuddun, d awal i itekksen sser, d awal yesendafen.

Ikiniken iqbayliyen

Acimi i nefren ad d-nemeslay γef ikiniken iqbayliyen ? – Am ikiniken igrikkiyen, ula d wiginni n Leqbayel, γas akkenni gan ixxamen, ur γrin ara am Antistan d Dyuginis, maca ugar deg-sen ur sen-tcuḥ ara ddunit. Degmi ara d-kkren d nutni d amberez yid-s, maca ul-nnsen yelha, γas akkenni yezga yeffeγ-d am win n weqjun.

Ula d wiginni iqjan i sen-neqqaren Leqbayel. Imi ur ttesteḥin ara; sriciwen zdat lγaci; skanen-d lesrar-nnsen; ulac d acu i tteffaren ama deg wulawen-nnsen, ama di tudert-nnsen. S tidett kan, ikiniken-agi ḥemmlen-ten akk lγaci, imi ulac win ittqilen, ama d tiwaculin-nnsen, ama d ibeṛṛaniyen. Werğin sεin aεdaw. Γas akkenni zgan ttnaγen yid-sen, maca ur teččḥen ara fell-asen medden. Ur teččḥen ara fell-asen lγaci imi ttagwaden ad asen-d-uγalen d iεwdawen. Musa n Maṛaγna, m ara yaweḍ γer ssuq, i meṛṛa imsewqen, ttazla anwa ara d-yesteqsin fell-as, ttimyezwirit anwa ara s-ixelṣen lqahwa imi ttagwaden i sen-yeqqar. Axaṭer ma yella kra i sen-yenna ad yuγal d awal, wa yattawi-t i wa, lğil a t-yettak i lğil.

Ikiniken ulac win i ttqaddaṛen, ulac win i ttagwaden. M ara d-yaweḍ wawal γer yimi-nsen, a t-id-inin. Ayen yebγu yeḍru. Γas ad yeglu s uqerruy-nsen. Wwet neγ qqim, d ṛṛuḥ n weqjun. Maca ikiniken d iqjan n ccetla akken i s-yeqqar Dyuginis. Mačči d iqjan menwala. Ur regwelen m ara trefdeḍ γer-sen aεekkwaz, ttkericcen. Ikiniken, γas akkenni seglafen, ttkericen. Mačči kan ttkericen, sṛajayen win ara kkercen. Awal-nnsen d tuγmest n weqjun, anda tkerrec, ad teğğ ccama i lebda. Degmi ulac win ten-yettawḍen. degmi i ttagwaden lγaci ad εeddin zdat wanda ttγimin d wanda ttillin.

Ikiniken qarren-d ayen ttxemmimen, yerna ssnen a t-id-inin. Iles-nnsen iserreḥ, ur t-yettqeriε ddin, ur t-yessusum wedrim, ur tḥebbes teγrit… Ikiniken ur k-tt-γafaṛen di lεid, ur heddṛen fell-ak deffir, ur ttdarin tiγemmaṛ. Σemden akk γef wayen d-qarren. Ladγa m ara d-maggren wagad-nni yesemγaren iman-nnsen, dγa ur ttkakrin ara akk. Ulac akk win i s-istεeṛfen. Ulac win yettzuxxun zdat-sen. Ar γer-sen medden kifkif. Akken tebγuḍ tesmuγreḍ iman-ik, mi d-tεeddaḍ zdat-sen a k-xṛebqen. Sraḥayen mbeεid wagad yesεan nnefxa, wagad yeččuṛen d nnefs. D lfeṛḥ-nnsen m ara walin wigad-agi.

Ikiniken, ḥaca nutni i isεan tilelli n umeslay. Werğin εeḍfen i yilsawen-nnsen. Werğin ṛgan a sen-yefk uqerru n taddart ameslay deg unejmaε. Ikiniken ttmeslayen ticki i ilaq ad meslayen, ur zmiren ad ṭṭfen imawen-nnsen. Xas ad fken lexṭiya, xas… Werğin qbilen takmamt.

Di tmurt n Leqbayel, ḥaca ikiniken i yeṭṭfen di tsirit n zik n zik. Ḥaca γer-sen i d-teggura teqbaylit taqqurant, tinna d-yeqqaren tidett. Γas akkenni qarren-asen iqujan, maca ur seglafen ara kan akka. Yal m ara d-rren yiwen ger wallen-nnsen, a t-ḍefren alama yecεef; yal m ara ten-yaweḍ yiwen, a t-rren s amkan-is s yiwen neγ sin wawalen.

Ikiniken, ḥaca nutni i yeṭṭfen di tmeslayt tantikkit, di tudert tagrakalit n zik. Tameslayt n ikiniken ulac deg-s ddin, ulac deg-s asmeεṛeq. Tameslayt n ikiniken ur tesε’ ara tilas. Ur s-yezmir lqanun, ur s-yezmir wacemma.

Ikiniken ulac swacu swayes ttamnen. Ur ttamnen s Ṛebbi, ur ttamnen s win i iḥekkmen. Ur ten-id-tecqi di lmut, ur ten-id-tecqi anda ara rren asmi ara mmten. Ikiniken, γas akkenni tikwal nḥafen, maca zgan ṭṭurcen am yeqjan n ccetla. Ulac akk win i izemren ad ten-iqerreb. Ur ttṛuḥun ara γer lğamaε akken ad ẓalen, ttṛuḥun akken ad tihin γef wid yettẓallan, ur ttṛuḥun ara γer unejmuε akken a d-fken ṛṛay-nnsen, ttṛuḥun akken ad sen-sfehmen i yergazen-nni yenejmaεen, d akken d lekteb akk ayen d-qarren, d akkelex akk wayen bγan a t-xedmen.

Ikiniken n tudrin, γas akken ur γrin ara, maca d lakkul, ssnen ad meslayen, ssnen ad meyzen, γas akkenni ugar n teswiεin tifrat d-ttakken tugar ugur di teqreḥ; ddwa sswayen yugar mseblu di teṛzeg. Maca ikiniken sakwayen. Akken qarren leqbayel : « Akken qerrḥent i neffεent ».

Ikiniken ur uḥwağğen yiwen. Zemren i iman-nnsen. Ikiniken ur sεin ara imdukkal. Maca zemren ad d-asen γer-k, zemren a k-reḍlen ma txuseḍ, d acu kan ad ten-txelṣeḍ akken ur swin ara asmi ara ten-terreḍ. Asmi s-yerḍel Musa n Maṛaγna iṣurdiyen i yiwen wergaz. Yiwen wass, Musa n Maṛaγna yeqqim di tejmeεt, ata iεedda-d umeṭalbu-nni. Iḥbes, iwwet γer lğib-is, ijebd-d tabbiyiṭ n iṣurdiyen, yefka-ten i Musa n Maṛaγna, yenna-yas : « Ax idrimen iyi-tettalaseḍ, a Dda Musa.’ – Yenna-yas Musa n Maṛaγna : « D tidett ? » -Yenna-yas wergaz-nni : « D tidett ih ! » – Dγa ikemsa-s tabbiyiṭ-nni s afus-is. Musa n Maṛaγna yeṭṭef tabbiyiṭ-nni, iweha-tt ar yiṭij, yettxezziṛ-itt. Argaz-nni yewhem, yenna-yas : « Aεni d asekkak, a Dda Mus ? » – Yenna-yas Musa n Maṛaγna : « Xaṭṭi. » – Yenna-yas wergaz-nni : « Ayγer ihi i ten-ttfuruḍ ? » – Yenna-yas

Musa n Maṛaγna : « Aḥeq acebbak ar s-ttγileγ ma qullen ad ten walliγ. » – Yiwen wass diγenna, Musa n Maṛaγna yefka-yas tabewaṭ n ccema i yiwen ilemẓi. Yiwen wass, yeqqim armi twerek tejmeεt d lγaci, dγa yenna-yas : « Aεni keččini ur d-tettxelliṣeḍ tabbewaṭ-nni n ccema k-fkiγ akken ? ».

Di tmurt n Leqbayel, ulac win yessnen taqbaylit sennig ikiniken. D nutni i d sser n tudrin. Anda ulac-iten, ulac lakkul, ulac ameslay yelhan, ameslay yesakkwayen, ameslay yekkaten azrem s aqerruy, ameslay yeseḍsayen, winna i itekksen ṭṭiq deg ullawen. Winna i yuklalen akken ad yettwaru, winna yuklalen akken ad yeqqim i lebda.

Ameziane Kezzar / Mohand Lounaci

(Amagrad-a yeffeɣ tikkelt tamezwarut di usmel: marenostrumarcadia)