Awalen ineggura n Garibaldi

garibaldi-main

Giuseppe Garibaldi

Amsifeḍ i yimdukkal-iw n sslaḥ

Wagi d awal romantik azeddig yenna-t-id Giuseppe Garibaldi di taggara n ta Ekspedisyu n Ugim, di 1860. Tihina, asenfar ameɣlul ixeddem-it s lalef kan n irgazen (sani d isem-is), d taslekt n yiwet tgelda tanayant, sstaɛarfen s-t-id tamazdayt internasyonal, i tesɛa lǧic alugan qawi. Tarennawt tella tamuqrant am lemxel n usenfar, d tefka-d unekcem n Napoli d Sisilya di tgelda n Piemont-Sardenya, tadyant taneggarut n usnulfu n Tagelda n Ṭelyan, ass n 17 meɣres 1861. Awal-agi, d inaw aqawi n argaz n tasureft, yessefk aram n ufud d tasḍa di tsertit. Tiẓultin tiqdimin i ɣabent di zman-nneɣ anhaw.

« Ilzem-a-neɣ ad-nsekked tallit i tekfa-d tura am aḥric aneggaru n talalit tamaynut-nneɣ, d ad-nheggi iman-nneɣ bac ad-nfuk s ccbaḥa ta konsepsyu i tessaɛǧeb, n ifraren n ɛecrin leǧyal, i ɣef lmektub yefka-d asmures i lǧil abextan-agi.

Yah a yilmeẓyen ! Ṭelyan tesɛa amerwas ɣur-wen, i yiwet lxedma tewwid-as usseffeq n umaḍal. Trenun, d mazal ad-renun, acku tura tesnem ta taktik taɛeskrit i tɣetes imenɣan. Kunwi mačči drus-a-wen zdat widak i kecmen-d uduren leqqayen n ti falanjin imakidonyen, d flan-d idmaren n imernayen izeddigen n Asya.

I wusebtar amuffir-agi n umezruy n tmurt-nneɣ ad-yeḍfer yiwen amaneg akter, d akli ad-issenɛat i gma-s ilelli uzzal uqḍiɛ n ixelxalen n ssnasel-ines.

Ar sslaḥ marra ! Marra ! Akk-nni isemsanen, d leqyad, ad-ferfiren am uɣebbaṛ.

Kunemti, lxalat, ɣur-went iberǧiǧen, ad-kun-fken wala iberǧiǧen; d kunemti, ulten n wakkal n tahuski, tebɣimt lǧil n ufud d leɛnaya ! Ma d i doktrinaren imegaden-nni, ad-ruḥen s ubandu-nsen d lmiziriya-nsen bɛid.

Agdud-agi d ssiyed n iman-is, yevɣa ad-yili gmat n igduden nniḍen, maca s zzux-ines d aynir-ines yullid, mačči d ameḥqur, yetter tlelli-ines, ur yevɣa-ara ad yili di ta remork nkra n imdanen s wul yerkan. Uhu ! Uhu ! Uhu !

Lmektub yefkad i Ṭelyan Victor-Emmanuel. Yal amdan aṭelyani yilzem-as ad-yeṭṭef-it, ad-yeḥcer d-id-s. Zdat agellid acebḥan, yal lxilafat yilzem-a-sen ad-kfun, yal cceḥna ad-tneger ! Tikkelt tajdidt, ad-ɛewdeɣ anza-inu: Ar sslaḥ mara ! Marra ! Ma di meɣres 1861 ulac yiwen umelyun n iṭelyaniyen s sslaḥ, ad-iniɣ aḥlil a tlelli, aḥlil ay akal aṭelyani…oh ! Uhu; bɛid cceṛ-agi, keṛheɣ-t am rrehǧ. Di waggur n meɣres 1861, ma mačči d win n furar, ad-yili yal yiwen gar-a-neɣ di lpost-is.

Iṭelyaniyen n Catalfini, n Palermo, n Volturno, n Ancona, n Castelfidardo, n Isernia, arnu yal argaz n wakal-agi i mačči d amagad, mačči d akli, yal-a-neɣ neḥcer userdas-nni amaneg n Palestro, ad-nefk zzenzla taneggarut, d tiyita taneggarut i tadankit alama ad-tteɣli !

Awi-t-id, ay i volonter ilmeẓyen, maca s mraw n imenɣan, awal-agi n umsifeḍ. Ceggeɛ-t-id s tayri i tqas-iyi-d, deg uleqqay n unelli-inu. Ass-a, yilzem-iyi ad-ruḥeɣ, d acu kan i cwiṭ n wussan. Ssaɛa n umenɣi, ad-illiɣ d-id-wen daɣen, gar iserdasen n tayunt taṭelaynit.

Widak ad-uɣalen ɣer ixxamen-nsen, yeqqim-a-sen ilasen imuqranen n twacult, d wihin s ffudin n tamanegt, ɣur-sen leqder n wuɣlan. Ad-kemlen lxedma-nsen di tuddar-nsen s iseqqamen-nsen, s uhanay n ti sikatris-nsen deg uynir n ɛecrin sna. Ma d widak nniḍen, ad-qqimen bac ad-ɛassen ɣef inayen imengan.

A kun-d-afeɣ di cwiṭ n wakud i tikli akken ɣer uslak n itmaten-nneɣ i mazal-a-sen iklan n uverra, maca i qrib ad-ddun d-id-neɣ i tirennawint tijdidin. »

Napoli, 8 wember 1860.

Assuqel: Nabil Kenana