Abeddel n yedles ɣer Pasolini

capture-decran-2016-09-22-a-02-12-18

Amagrad yeffeγ-d ass n 9 duğember 1973 deg uğernan Corriere della sera, s yisem n Sfida ai dirigenti della televisione*.

Aṭas seg wid yesmuγbunen, tettrun (ladɣa deg ussan-a n ta Austerity) seg leεtab d-yekkan seg lixṣaṣ n tudert tamettant d tdelsant i yellan (berra i tlemmast « yumsen ») deg yigerbiyen « izeddganen » (ixammen n yiḍes ur nesεi tizegzewt, ur nesεi kra neγ kra, la tilelli, la timliliyin n tidet gar yemdanen). Dɣa, ma yella lixṣaṣ-a, s tidet deg yigerbiyen, d talemmast i t-id-ixelqen, i t-yessuddsen, talemmast-nni akka kra n yiseggasen γer deffir, tessedrem yakk idelsan n wayen i s-d-yezzin, wid akken yellan zik – ih, almi d iseggasen-a ineggura – ttaken-d tudert s timmad-is, s tlelli-s talqayant, ɣas ula deg tudrin yenḥafen, yenṭerren seg ulac.

Ula yiwet n tsertit tafacist ur tewwiḍ ad texdem ayen texdem tsertit n uɛebbuḍ d wučči. Lfacism yefka-d yiwen n lqaleb, s tidet, yettarran ɣer deffir, meɛna akken kan i yeqqim, yiwen ur s-igi ccan. Idelsan nniḍen (n yimesdurar, n yipruliṭariyen, n yixeddamen) ttkemmilen ttidiren s lqaleb-nsen mebla ma icewwel-iten yiwen, acku azaglu d lbaṭṭel yessutur deg-sen ala attekki-nsen s wawal. Deg ussan ideg d-negra, d anemgal, ilaq ad tekkiḍ s lekmal ɣer lqwaleb i d-tḥettem tlemmast mebla ma yuli-k-id wawal. Imdanen ǧǧan tudert iɣef d-kkren. Nezmer ad d-nwekked belli “ṭṭuɛ” n tedyulujit tahidunist i yebɣa leḥkem ajdid ad d-yessers i d azaglu yakk meqqren seg wid d-yeɣlin ɣef medden seg wasmi d-tlul ddunit ar tura. Amek ɛni i d-yeɣli uzaglu-a ɣef medden? S snat tegrawliyin, i d-ilulen sdaxel n tuddsa taburjwazit: tagrawla n lbenyan d tegrawla yeɛnan isallen. Iberdan, timacinin, imuturen… ssemlalen tudrin d tlemmast, kra yellan yuɣal yeqreb. Dacu tagrawla n telɣut d tɣamsa tɛedda akin seg teqseḥ. S ttawil n tilivizyu, talemmast terra yak tamurt d yiwet-is, tinna akken yellan zik temxallaf, d tamerkanṭit s yidelsan n temnaḍin-is. Yebda leqdic meqqren i useɛdel d unurmalizi, dɣa leqdic-nni n tidet ur nelli d aweɛni, yerna – akken t-id-nniɣ- iḥettem-d leqwaleb-is: lmul yebɣa ṣṣef aṣnayɛi ajdid, ur yesqenɛen ara kan s “wemdan itetten” meɛna ur iqebblen ara yak tidyulujit nniḍen sennig n tin n wučči d uɛebbuḍ. Aya iwumi neqqar ahidunism aneo-alayiki, ur d-yecqi ula seg yiwen n wazal n wemdan, d aberrani yak ɣef tussniwin talsanin.

 Tidyulujit taqdimt i yebɣa ad yeẓẓu leḥkem, akken neẓra yakk, d ddin: D takatulikit kan i d abrid adelsan awḥid i “yesdukklen” Iṭelyaniyen. Assa, atan yettemssazal d ubrid-a adelsan ajdid “amsudeklan”, win iwumi nga isem n uhidunism n lɣaci, dɣa seg akken i s-d-yezga deg webrid (ddin), leḥkem ajdid yebda iseggasen-a ineggura yettnuɣ-it. Dɣa, ulac yak amkan n ddin deg lqaleb n yilemẓi d tlemẓit i d-teskanay, i d-tḥettem tilivizyu. ɣer yilemẓi d tlemẓit-a, ulac azal nniḍen n ddunit sennig isafaren n wučči (ih, d tidet, mazal ttruḥen ass n lḥedd ɣer temsgida: s ṭumubil). Iṭelyaniyen cerhen nezzeh s lqaleb-a ajdid i sen-d-tḥettem tilivizyu, i tesbedd s llsas n sselɛa i d-ixellqen lehna d tumert (neɣ, am axir, tettsellik seg lmizirya). Qeblen-t lqaleb-a, ih, meɛna wissen ma s tidet ad t-ssiwḍen? Xaṭi. Neɣ ssawaḍen cwiṭ kan n tama deg-s s dduzan d igerwizen, meɛna uɣalen d taḍsa, neɣ d aɛaned kan i t-ttɛanaden, di taggara ur t-wwiḍen ara almi yuɣalen d imesxuḍen. Dɣa, lemrara d wefḍam neɣ tteqlaq ssaɣen ulawen dɣa ɣef tikelt. Deg umedya : Ipruliṭariyen, almi d iseggasen-a ineggura, llan ttqadaren idles yerna ur ttsedḥin ara s twaresnit-nsen (lqella-nsen n tmusni), llan ɛad ttzuxun s lqaleb-nsen aɣerfan n wid ur yeɣrin ara, i d-yeṭṭfen tidet s wadda. S temḥeqranit i ttwalin “arraw n papa”, iburjwaziyen imecṭuḥen, iɣef kkaten ad mxallafen fell-asen ɣas deg tikwal-nni ideg tettuḥettem fell-asen ad qedcen fell-asen. Assa, d anemgal, ttsedḥin s twaresnit-nsen, nekren lqaleb-nsen adelsan (Ilmeẓyen dɣa ur d-cfin ara maḍi fell-as, dayen iruḥ-asen), u lqaleb ajdid i yebɣan ad ɛanden ulac deg-s tiḥercewt d lqella n tɣuri. Ilmeẓyen ipruliṭariyen – ttsedḥin – teffren isem n lḥirfa-nsen i d-yuran ɣef nnekwan-nsen, ttarran iman-nsen d “inelmaden”. Dɣa segmi i yebdan ttsedḥin imi ur ɣrin ara, uɣalen ḥeqqren idles (ṭṭbiɛa tamaynut i d-wwin imerkantiyen ijdiden s lemɛanda).

Deg tama nniḍen, ilemẓi amerkanṭi-ajdid, i yebɣan ad yettak anezzih ɣer lqaleb n “tilivizyu” – i yerran fell-as, amzun akken d ccetla-s, d ṣṣef-is i t-id-ixelqen s lebɣi-s – yuɣal d ameɣbun ur yesɛi sser, d ttewḥid!! Ma yella iprulṭariyen ttburjwazin, iburjwaten pruliṭariyen. Idles i d-xellqen, akken d tatiknulujit d ujerreb, yugi ad yeǧǧ « amɣar-nni » yellan deg-sen ad yegmu. Dɣa sya i d-tekka lqella-nsen n lefhama d lmeɛna. Aya ssebba-ines tameqrant yakk d tilivizyu, mačči imi d ttawil usiweḍ, meɛna imi s-yuɣal d aɛekkaz i leḥkem, d leḥkem s timmad-is. Axaṭer ur yeqqim ara kan d ttawil-nni ideg d-nesssawaḍ ameslay d wawal, meɛna yuɣal d amkan ideg d-nxelleq awalen d lemɛani. Tuɣal d axxam i yiwet n lɛeqliya, ur neẓri anda ara tezdeɣ, anda ara terr lemmer ulac-itt, tilivizyu-a. S ttawil n tilivizyu i d-yettban deg tilawt leḥkem-a ajdid.

Mebla ccekk (agemmuḍ yesban-it-id), ulac yakk ttawil ijehden deg umaḍal deg uɛebɛeb d uẓeyyer am tilivizyu. Aɣmis afacist d tira n yisluguten n Musulini ɣef yeɣraben n lfirmat sseḍsayen sdat-s: amzun akken d lmaɛun sdat n wetraktur.. Lfacism, ad t-id-alseɣ i tikelt nniḍen, werǧin yessaweḍ ad yexbec ula d axbac iman n weɣref aṭelyani. Lfacism-a ajdid, s ttawilat-a imaynuten n usiweḍ (aladɣa tilivizyu), mačči kan d axbac i t-yexbec, meɛna yegzer-it, ibečč-it, yemsex-it, yesseḥnunef-it deg tɣerɣert, yesseɣli-t ur yettɛawad ara ad d-yekker i lebda.

* Ixf aneggaru n umegrad-agi, isem-is Una sfida, yekkes dagi, am tazrigt i ittixdem umyaru di wudlis Scritti corsari.

Assuqel: Berkus Tiwal

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion /  Changer )

Photo Google+

Vous commentez à l'aide de votre compte Google+. Déconnexion /  Changer )

Image Twitter

Vous commentez à l'aide de votre compte Twitter. Déconnexion /  Changer )

Photo Facebook

Vous commentez à l'aide de votre compte Facebook. Déconnexion /  Changer )

Connexion à %s